O Bloque Nacionalista Galego (BNG) presentou no Parlamento de Galicia unha proposición non de lei co obxectivo de que a Xunta amplíe o prazo de exposición pública do proxecto da planta de tratamento de residuos e produción de biometano prevista en Xunqueira de Ambía (Ourense). A iniciativa chega tras detectarse problemas de acceso á documentación ambiental publicada pola Consellería de Medio Ambiente no seu portal web.
As deputadas e deputados Sonia Vidal Lamas, Xosé Manuel Golpe Acuña e Luís Bará explicaron que o expediente da empresa Biofertilizantes Xunqueira de Ambía S.L. (2024-IPPC-I-153) non se podía consultar a través do buscador da Xunta, a pesar de terse anunciado oficialmente no Diario Oficial de Galicia o 3 de outubro. «Esta situación vulnera o dereito da cidadanía a acceder á información ambiental e impide presentar alegacións en prazo», denunciaron.
«A Xunta debe garantir transparencia e participación real. Non é admisible que un fallo informático reduza dereitos nin silencie a veciñanza afectada», subliñou Sonia Vidal, portavoz nacionalista no concello.
O BNG propón que se amplíe o prazo de exposición pública polo tempo que durase a falta de acceso e que esa ampliación se publique no DOG, en cumprimento da Lei 5/2017. Ademais, rexistraron preguntas parlamentarias para aclarar as causas do fallo, as medidas correctoras e as responsabilidades.
Vidal tamén criticou que o PP local “pretende xogar ao despiste coa veciñanza”, ao presentar unha moción asegurando descoñecer o impacto do proxecto cando xa existía un informe favorable do concello datado en febreiro de 2024.
Desde o BNG, reiteran o seu compromiso coa defensa dos dereitos, a saúde e o territorio de Xunqueira de Ambía fronte a calquera iniciativa empresarial que non garanta transparencia nin respecto ambiental.
